Camp da trenament 2022 Terchia

Suenter in liung temps da pandemia astgein nus puspei ir a nies camp da trenament. La destinaziun ei Belek – Antalya ella Terchia. Cun in diember da 18 participonts essan nus tons sco aunc mai. Probabel tuts ch’ein leds da puspei saver ir egl exteriur. Dallas 9.30 ei nies chauffeur Silvio Casanova (Gartmann) vegnius cun in dètg slonsch entuorn la cantunada dalla scola veglia a Rueun. Cargau valischas e giugadurs essan nus semess sin via en direcziun Turitg. Naturalmein astga il harass gervosas buca muncar. Ein Harass im Bus ist ein Muss. Cun grond plascher ha Roni-Bügel repartgiu la gervosa e nus essan sesenti prima. Silvio ha manischau nus a moda suverana entochen il plaz aviatic. Incaps ha ei dau negins. Sulettamein Bischki-café – ojee mine. Dallas 14.00 ei igl aviun ius els aults. Il sgol ha cuzzau biebein 3 uras. Muort la differenza da temps (2 h) era ei gia las 19.00 cu nus essan setschentai ad Antalya. Cun in bus da transfer ed in rassig chauffeur essan nus beinspert arrivai en nies bellezia hotel «Bellis Deluxe». Direct suenter l’arrivada essan nus stai a guder ina stupenta tscheina. Silsuenter havein nus retratg las combras dublas. En general essan nus satisfatgs dalla purschida e nus sesentin fetg bein. Cun in bien funs essan nus ir en direcziun bar e vein passentau ina biala e legra sera/notg. Era las gervosas terchas gustan a beinenqual giugadur. Nies survient Kegel ha purschiu a nus ina bubronda tipic-tercha, il schinumnau viagra da Terchs. Quei era l’endretga finiziun per quei gi. Damaun ha ei num -> esser fits per ils trenaments. Dapli astgeis vus leger damaun.

Simon e Tizian

Suenter ina cuorta notg ein tuts pli u meins fits s'entupai per igl ensolver. Il buffet purscheva per mintga gust enzatgei. Plein forzas e cun gronda motivaziun essan nus i encunter il plaz da balla. La buna luna era cuort naven, cu nus vein viu co ils terchs tegnan el "zoo dil hotel" las tscharvas en pigns clauders. Sgarscheivel!!

L'entschatta mavi per puspei survegnir il sentiment per la balla. Nus vein fatg in per buns exercezis ed ils trenaders eran cuntents cun nus. Zitat da Joris: Vus essas fetg buns, aber zatgei datti adina da trenar.

Avon la marenda essan nus stai a far in cuort bogn per serevegnir dallas strapazas.

Mo per tuts eri buca avunda. Simon e Joris han aunc stuiu far empau trenament suplementar, numnadamein "Wasseraerobic". Joris ha profitau da quei bien trenament. Silsuenter havein nus fatg ina cuorta spassegiada sper la mar. Tgei bellezia survesta. Era sch’il sulegl ha fatg oz ina buna lavur, era ei memia freid da ir ella mar. In bien gentar ha buca astgau muncar. Lu era ei temps per il trenament dil suentermiezdi.

Las temperaturas eran pli emperneivlas, aschia che nus vein saviu trenar empau tactica per nies giug che spetga damaun sin nus. La fin vein aunc sittau sin gol. Ins ha sentiu ch'ils biars han giu ina liunga notg. Las ballas sgulavan en tuttas direcziuns. Igl emprem suenter il trenament che nus vein fatg era beiber "Zielwasser". Suenter ruassar e far patgific essan nus tuts ensemen i a tscheina ed schau ir bein cun nus. Naturalmein astgan in tochen dus piers buca muncar.

Joel, Rafael e Luca

Suenter ina strentga e turmentusa notg essan nus s'entupai sco mintga damaun ad ensolver. Entgins da nus eran schon empauet nervus sil giug amicabel dil suentermiezdi. Cun combas grevas essan nus serendi enviers il plaz per nies proxim trenament. Damai ch’il giug amicabel steva avon porta havein nus absolviu in trenament pli luc che usitau. Per il motiv che nus havein constatau all’entschatta dil camp da trenament che noss'equipa posseda memia biars giugadurs cun ina “wampaaaa” essan nus vegni partgi en duas gruppas per giugar in giug da trenament. Negin havess spitgau che “Team wampaa” sappi dar aschi bein ballapei, els han numnadamein gudignau il giug cun grond avantatg. Per sepreparar pil giug amicabel havein nus silsuenter gudiu in bogn frestgentont per sluccar la musculatura. Dallas 15:00 ha igl arbiter allura aviert il giug amicabel encunter SG Schorndorf dalla Tiaratudestga cun in suffel en siu pign schuletg. Cun bien slontsch, denton cun combas aunc pli grevas, essan nus parti en quei giug sin in plaz ch’era dubel aschi gronds sco quel che sesanfla tier nus a casa. Muort fetg bien engaschi ell’emprema mesadad eran nus mo 0:1 anavos. Da pausa ha nies survient “Kegel” purtau ina schala bananas per che nus saveien puspei emplenir nies tanc d’energia ch'era vits. Cun quater giugadurs “frestgs” essan nus parti en la secunda mesadad, denter auter Pascal che ha giugau siu davos giug per l’US Rueun. Suenter pausa eisi semussau ch’ils Tudestgs havevan pli levas che nus, igl ei numnadamien gartegiau ad els da far 4 ulteriurs goals. Igl arbiter ha giu cumpassiun cun nus e ha schulau giu il giug ella 88avla minuta. Suenter quei giug plein strapazs havein nus gudiu ina sauna beinmeritada. Enqual giugadur ha preferiu da schar smugliar atras las musclas d’ina masseura navenda sum tochen dem. Quei di stentus havein nus lu terminau cun ina ni l'autra gervosa ella bar…..

Tobias, Ian, Christian e Dominic

Allas 7:30 han per la gronda part ils svegliarins scalinau en nossas combras. Suenter la pli liunga notg tochen uss el camp han certins giu levamein breigias da dumigniar dad ir giu al solver. Cun in pign agid per enqualin han lu tuts dumignau ei. Cun grevas combas dil giug essan ir en direcziun plaz da bal. Nus havein denton spert sefatg en ch'ei era oz in bien ton pli freid, ed il vent targeva pulitamein ferm. Per sescaldar essan curri duas rundas entuorn il plaz e cuntinuau cun in exercezi. Las temperaturas cumbinadas cun in vent fetg ferm han buca lubiu a nus da trenar sco nus levan. Il coach ha decidiu da rumper giu il trenament sil plaz da bal, denton era ei aunc buca finiu. Suenter ina sescumiada en combra essan tuts ensemen i el bogn cuvretg per far vinavon cun aquafit. Silsuenter havein meritau il miezgi.

Il suentermiezgi ha entschiet cun ina spassegiada giu tier la mar e guder il sulegl. Avon il proxim trenament ha mintgin aunc giu peda per sluccar las combas e guder il ruaus. Sentupada per ir a trenament ei mintgamai en zuler tier la maschina da caffè. Cun grond engaschi havein sescumiau per nies davos trenament dil camp 2022. Arrivai sil plaz da bal, havein entschiet a sescaldar si cun temperaturas pli enperneivlas. Per il davos trenament havein buca pli scarpau sughets e dau in giug per plascher. Ils "stetgels" han buca vuliu seser sin lur terrada dil gi avon. Las "wampaaas" han giu empau combas pli grevas ed han stuiu dar la victoria suenter liung ed intesiv cumbat ord maun. Frestgs e schubers essan s'entupai ella lobby sin enqualina gervosa, in ni lauter jass e bunas paterladas avon tscheina. Ils venters ein pleins e silsuenter astgein aunc guder ina biala sera d`equipa. 

Silvan, Diogo, Roni

Oz ei il di da partenza enviers casa. Suenter ina sera hilarica cun bia risadas e buna cumpignia sesemtgein nus oz pil retuorn en patria. Igl ei puspei stau in bellezia camp, l'aura era freida, mo il sulegl ha sclariu e nus havein saviu far nos trenaments sco giavischau. Nies anteriur coach, il Damian, ha priu part sco davosa ga al camp - da lezzas uras avon Corona fuss el gie aunc staus trenader. Uss ha el segidau en caussa. Secapescha ch'el ha buca saviu schar star dad era dar ballapei - cun tut las consequenzas. Il polisch blau vegn aunc ditg a star en regurdientscha. Mo el ei buc il sulet cun blessuras. Tonaton: Bi eisi stau! Engraziel a tuts che han organisau e mirau che tut gartegi, cunzun a Joris ch'ei staus responsabels per la gronda part dall'organisaziun dil viadi e dils trenaments.

Sin bien seveser in'autra ga.

Damian