Cun haver durmiu dapli ni pli pauc ein tuts cumpari al solver. Bein motivai e da bellezia cundiziuns dad aura havein saviu entscheiver igl emprem trenament giuadora sin pastg suenter la pausa d'unviern.

Igl emprem trenament ei ellas combas. Per sluccar la musclas havein dau in segl ella mar. Silsuenter havein aunc sedivertiu sin entginas ruschneras, sco affons pigns, entochen che la marenda ha clamau.

Per rimnar novas forzas pil secund trenament dil gi havein nezegiau la pausa da miezgi per far in cupid.

El trenament da suentermiezgi havein nus giugadurs ed il trenader viu nua che nos deficits schaian. Duront trenar leva ina tartaruga far concurrenza da cuorer a nus.

Igl emprem gi da trenar havein dumignau senza incaps. Sco finiziun hai aunc dau ina senudada el bogn cuvretg.

La tscheina ei magliada, las gervosas ein freidas e tuts ein cuntents da guder ina biala sera cul program da divertiment dil hotel.

Adam, Christian, Elia e Silvan

Suenter ina hazra tschenada essan nus serendi enviers la lounge tier in impurtont termin. Numnadamein allas 21:30 uras ein nossas treis cameratas digl onn vargau vegnidas e presentau il renomau sault da venter. Igl ei quei sault che ha inspirau bein enqualin da nos settagols da giubilar sur da lur tiradas sil plaz. Donn e puccau ei che nossas beinenconuschentas wampas ein buca vegnidas clamadas si da mussar lur talents da sault. Sco usitau ei la sera / damaun vegnida serrada giu cun ina ni l’autra gervosa.

Suenter ina cuorta notg essan nus sballunai pli u meins fits enviers il buffet d’ensolver. Gia cun combas grevas essan nus serendi al trenament dalla damaun. L’aura era deplorablamein buca pli schi buna sco il gi vargau, denton dirs sco nus essan ha quei fatg ora nuot a nus.

Suenter in trenament intesiv ha ei dau in bien gentar. Cunquei che las combas ein buc vegnidas pli levas han certs giugadurs priu la decisiun da reservar in termin da massascha. Damai che nies trenader ei staus aschi cuntents cun nus havein nus fatg il suentermiezgi  in’excursiun ad Antalya City. Suenter ina cuorta spassegiada atras il marcau essan spert setschentai en in’ustria al port. Tgei survesta extraordinaria! Naturalmein, aviarts sco nus essan, havein empruau ina specialitad dalla Terchia: il schinumnau raki «Kaki». In gust tut oreifer denton bien nuot. Silsuenter essan serendi anavos tier nies hotel.

Tut en tut eis ei stau in gi fetg ruasseivel. Tgisa tgei che quei munta per la sera?

Simon, Joel, Mirco, Rafael

La sera ha entschiet ruasseivlamein cun ina gervosa bein meritada ella lobby. Perquei che la meisa vischinonta fageva ina tala huara canera ha ei spuentau nus giu ella lounge. Leu haveinsa giu bunas discussiuns e dau giugs divertents. Certs han silsuenter aunc gudiu in snack da mesanotg ell‘ustria. Tgi ei lu ius pli baul e tgi pli tard a letg. 

Suenter ina cuorta notg essa nus s’entupai allas otg ad ensolver. Perquei ch’in giug amicabel spitgava nus il suentermiezdi havein nus desistiu da trenar igl avonmiezdi. Enstagl havein nus fatg ina sesida d‘equipa nua che Joris ha declarau a nus sias spetgas e finamiras per la primavera. Medemamein ha Joris decidiu da dar anavos la rolla sco capitani a Mirco. 

Suenter ina buna marenda essan nus s’entupai plein motivatiun per nies giug amicabel. Nies adversari era l‘academia d‘Antalya Spor, ina academia per giuvens cun potenzial per daventar profis. La nova tactica ch‘ei vegnida presentada igl avonmiezdi alla sesida havein nus empruau da metter entuorn el giug. Denter auter currin nus en meins ditg, persuenter pli efficient e dein ina nova formaziun, in 4-3-3. Cu il giug ei ius libers havein nus constatau spert che nos adversaris ein atlets fetg sperts, cundiziunalmein ferms e tecnicamein surora a nus. Las empremas 10 minutas havein nus pudiu tener suenter flot cun in pèr bunas schanzas. Nossa cundiziun ei denton aunc buca sil punct culminont, aschia che nus savein vi da tgei che nus stuein aunc luvrar. Suenter in dir cumbat per mintga singul bal havein nus stuiu ceder la finfinala cun in knapp resultat da 6:0. Tuttina era quei in bien test per nus cun in emperneivel adversari nua che nus havein era saviu prender cun nus ina ni l’autra caussa. Per sluccar nossas musclas havein nus gudiu in bogn terc, ina sauna che era ina gronda satisfacziun ed ina senudada el tarladiu bogn cuvretg. Uss essan nus semtgai e spanegiai sin nossa sera famigliara. Dapli dalla sera famigliara saveis vus leger el blog da damaun. 

Tobias, Martin, Ian, Nicolas

Dallas 20:15 essan nus s’entupai en ina stanza da sesidas per festivar nossa sera famigliara. Nies trenader ha fatg in beinvegni e presentau a nus entginas statisticas digl OFV dils davos diesch onns. Malgrad che la statistica era buca diltut correcta havein nus retschiert fatgs fetg interessants e surprendents. Silsuenter han ils dus novizs Adam ed Elia «astgau, buca vuliu, aber stuiu» partger en ils participonts en duas gruppas per ils giugs preparai da Christian e Simon. Ils giugs «Montagsmaler» e pantomima han destadau entgins talents zuppai e procurau per massa fatschas rientas. Suenter ina cuorta pausa per l’organisaziun da pier ed satisfar ils basegns ha Tizian cuntinuau la sera cun in vers humoristic sur da mintga present. El tierz giug era la finamira d’enconuscher nos congiugadurs sin maletgs ch’eran zoomai e mussavan plaunsiu dapli e dapli dalla persuna encuretga. Sco premi dalla sera han ils victurs astgau schar survir si dils adversaris. Duront e suenter las sera famigliara havein nus gudiu entginas gervosas tier ina buna paterlada.

La damaun suenter han treis giugadurs munchentau igl ensolver, quei che ha caschunau per consequenzas duront il trenament dalla damaun. Cun combas grevas dil giug amicabel havein nus trenau e migliurau nos culps libers. Suenter la viseta usitada el pool havein nus dustau la fom da magliar e da mirar skis. Odi ei semplamein fantastics. Donn ch’el ei buc in ballapeiist dall’USR.

Il davos trenament da quei camp havein nus dau la lutga tradiziunala dil team «wampa» encunter ils stetgels. Ina mes’ura fetg disputada ha purtau negin victur (3 : 3). Perquei han ils penaltis stuiu decider. Ina gronda part dil team wampa astgi buca sittar penaltis el campiunadi, ha il trenader manegiau.

Sco finiziun havein nus dau in quiz en gruppas da quater. Il FC Feiern ha gudignau il quiz divertent e per part fetg difficil. Cunquei che rispostas correctas valevan mo sche l’equipa tuccava suenter il gol, ei quei tuttina iu in dètg mument.

Sco mintg’onn han in pèr duvrau ina massascha dallas asiatas fetg talentadas e sutschazegiadas. Auters han aunc dau ina senudada el pool. Ina buna tscheina ha iniziau nossa davosa sera el hotel. Tgei che lezza ha tut purtau saveis vus leger damaun.

Dominic, Roni, Tizian e Luca